Kjære publikum!
Velkommen til festival 1.-3. juli i Lensvik!
| Siste nytt | 29. mai 2010 - Programmet er lagt ut. |
Kjære publikum!
Kibneb-festivalen er eit sosialt medium. Utruleg, men sant!
Da vi starta festivalen fannst nesten ikkje internett, det var mest fax, og det var fantastisk nok. Astrid Lindgren levde enno, det gjorde Michael Jackson også, og ein kunne balansere på line mellom Twin Tower. Skulle ein være sosial så måtte ein gå ut, ta bussen, snakke litt med sjåføren, eller ein måtte gå på butikken og treffe folk der, og kanskje seie at i dag er det grillvær, eller ta båten til byen og spør dama i kiosken om ein skal stille klokka fram eller tilbake til sommartid? Eller ein kunne ringe til nokon, snurre skiva rundt med pekefingeren på den grå telefonen, kremte og seie hallo, hallo, korleis står det til? Berre bra. Hei på deg. Hei på deg, Ludvigsen. Og så kunne ein snakke om ein film ein hadde sett, Änglagård kanskje, eller Kristin Laveransdatter, og så kunne ein legge på og sette på Dagsrevyen der Clinton prøvde så godt han kunne å forklare seg, og ei heil verd fekk noko å snakke om når dei sat på flyet, i bussen, i butikken, på båten, eller om stakkars
Hillary når dei gjekk Jordbærtrimmen.
No ligg alt dette på skjermar som lyser blått inn i natta; kva filmar folk har sett, bilete frå ferieturar, festar og alle songane frå 80-talet. Vi skriv på tavlene til kvarandre, seier liker dette, og heile tida kjem det nye meldingar, ein uendeleg straum av korte blaff. Det er sol ute. I like. Gamle klassekameratar vil bli vener. Kva dyr er du i sjela di? Kven er du i Monty Python? Kven er du i Pelle Parafins Bøljeband? Kven er du i gresk mytologi?
Skal vi ikkje slå av skjermane? Og heller gå ein tur langs vegen og sjå kven vi møter der? Kommentere statusen deira, skal du til syden, du? Gå på butikken og spørre om du stiller klokka fram eller tilbake til sommartid når du legg grillribba på disken. Eller ringe nokon utan heilt å vite kva du ringer for. Eller gå på konsert! Stå der i køa og bable litt, og seie etter konserten: eg likar dette, eller kommenter eit eller anna: Hans Petter Nilsen er skikkeleg god på Limericks! Veit du at han var med i første episoden av Himmelblå? Og plutseleg er du midt oppi eit sosialt medium; du snakkar med den som sel billettar, den som sit attmed deg på konserten, du ser den som spelar og kanskje ser den som spelar deg, og eit ørlite pust blaffrar i deg, som eit bål som heilt uventa får eit vindpust servert frå sida, i stunda før sola stangar seg over Blåheia og ein ny dag sprenger seg fram!
Utruleg, men sant; Kibneb-festivalen er eit sosialt medium!